Fleet Foxes

Ég var ekkert búinn að sjá eða heyra í þessu bandi fyrr en ég sá að fyrsti almennilegi frumburður þeirra fékk 9 í einkunn á Pitchfork. Þar sem að ég lifi skv. þeirri reglu að það sé ekki oft að marka dóma Pitchfork en allar plötur sem fá yfir 7,5 þar eru í hið minnsta áhugaverðar. Þess vegna ákvað ég nú að tjekka á þessari plötu. Fleet Foxes eru 5 drengir frá Seattle sem gefa plöturnar sínar út hjá Sub Pop

Ég veit ekki alveg hvar ég á að staðsetja Fleet Foxes. Manni verður hugsað til rólegri útgáfu af My Morning Jacket vegna raddar söngvarans. Beach Boys koma af og til í hugann vegna flottar röddunar. En í raun er þetta bara mjög jarðbundið bandarískt rokk. Maður fær á tilfinninguna að platan hafi örugglega verið samin í kofa í Vermont og svo unnið betur í lögunum þegar í siðmenninguna var komið.

Lagasmíðarnar á þessari plötu eru nefnilega hennar lang sterkasti hluti. Lögin hafa það yfir sér að það hefur örugglega verið legið yfir þeim í einhvern tíma og það virðist vera einmitt nógu mikið af öllu í hvert sinn. Það er ekki verið að hrúga óþarfa hljóðfærum þegar ekki þarf þess. Það sést t.d. í lokalaginu Oliver James sem þarf ekki neitt meira en kassagítar og söng og í endann á laginu þegar gítarnum er meira að segja sleppt þá grípur það mann algjörlega og er frábær endir á plötunni.

Ég mæli alveg með að þú tékkir á þessu. Ég læt hér fylgja tvö lög af plötunni.

Your Protector gefur góða mynd af rólegri lögum plötunnar.
He Doesn't Know Why er aðeins meira upbeat lag og bæði þessi lög sýna styrk lagasmíða þessara kumpána.

Wolf Parade

Nýja Wolf Parade platan, At Mount Zoomer, kom út síðasta þriðjudag svo ég arkaði auðvitað samdægurs í Easy Street Records (sem er nokkurn veginn æðislegasta plötubúð ever á eftir Amoeba Records í San Fransisco) og keypti hana. Mér finnst þetta vera frekar dæmigerð plata númer tvö, þ.e. hún er miklu heilsteyptari en sú fyrri og jafnbetri. Það eru kannski ekki jafn augljós snilldarmóment eins og I'll Believe In Anything en upp á móti kemur að það eru engir duds heldur. Það er heldur engin lognmolla í gangi því það eru algjörir gullmolar hérna eins og hið frábæra California Dreamer sem er án efa eitt besta lag þeirra félaga. Þrátt fyrir að ég eigi skyndilega allt of mikið af góðri tónlist þá kemst ekkert að í spilaranum nema þessi plata... hún er bara það góð. Ekki betri eða verri en sú fyrri heldur bara öðruvísi og það er gott!

Wolf Parade - California Dreamer
Wolf Parade - Fine Young Cannibals

Listafrí

Glöggir lesendur hafa kannski tekið eftir því að það birtust engir listar hér á föstudaginn. Ástæðan er einfaldlega sú að Svenni var í Þýskalandi, Erla var að heimsækja Krissu og Vigga í Montréal og ég var á leiðinni heim frá Seattle. Ástandið fer þó ekki batnandi því nú erum bæði ég og Svenni á leið til Danmerkur og Krissa og Viggi eru að fara í roadtrip um Bandaríkin. Við erum svo kosmó að það hálfa væri nóg.

Það hefur því verið ákveðið að toppfimm fer í opinbert listafrí þar til föstudaginn 18. júlí. Við eigum alveg eftir að skrifa um tónlist á þessum tíma en skipulögð listastarfsemi verður lögð niður næstu þrjár vikur.

Eurythmics

Ég er öll í tilviljunum þessa dagana. Í gær var Martha Wainwright að syngja Eurythmics lagið Love Is A Stranger og ég fattaði svo að IT gaurinn í Akutan lét mig hafa Greatest Hits með Eurythmics um daginn. Nú er ég ekki mikill aðdáandi bestof diska en mér þykir ansi vænt um þetta tiltekna safn því bróðir minn gaf mér það á kassettu þegar ég var lítil (eins og svo margt annað gott) og ég hlustaði endalaust á það. Ég hef nú satt að segja ekki hlustað meðvitað á Eurythmics í mörg ár svo ég er í alveg brjáluðu nostalgíukasti að hlusta á þetta núna. Vá hvað Annie Lennox er mikið æði! Úff og nú er ég komin með algjört æði fyrir Love Is A Stranger og spila það á repeat eins og enginn sé morgundagurinn.

Eurythmics - Love Is A Stranger af Sweet Dreams (Are Made Of This) (1983)
Eurythmics - Would I Lie To You af Be Yourself Tonight (1985)

Martha Wainwright

Músíkblogg frá Seattle? Já af hverju ekki. Ég fór í pílagrímsleiðangur í plötubúðina Easy Street Records í fyrrakvöld og það var sko aldeilis ómaksins virði. Þvílíkur gimsteinn sem sú búð er. Ég keypti auðvitað allt of mikið af diskum enda voru þeir svo ódýrir að það væri allt eins hægt að gefa þá (ókei ég keypti fyrir $120 sem er ekki alveg gefins en ég fékk svo mikið fyrir peninginn!). Ég keypti nokkra glænýja og heita, nokkra sem eru búnir að vera lengi á tobuy listanum og nokkra notaða sem voru bara svo ódýrir að það hefði verið glæpur að kaupa þá ekki.

Ég keypti m.a. nýju plötuna hennar Mörthu Wainwright sem kom út á dögunum og ber hinn stórkostlega titil I Know You're Married But I've Got Feelings Too. Í alvöru talað, hversu gott nafn er það á plötu? Geggjað segi ég! Jámm en allavega eftir nokkrar hlustanir verð ég að segja að ég er nokkuð hrifin og er alveg viss um að ég verði enn hrifnari með tímanum og ég er ekki bara að segja þetta af því ég er nýbúin að drekka þrjár margarítur úti í sólinni og er þess vegna ótrúlega jákvæð. Í alvöru. Mér finnst í raun fyndin tilviljun að þessi plata skuli hafa verið að koma út núna því ég er búin að vera með lagið hennar Bloody Mother Fucking Asshole á heilanum alla þessa ferð. Mikið ósköp er það gott lag.

Martha Wainwright - Bleeding All Over You
Martha Wainwright - Love Is A Stranger (Eurythmics cover)

Topp 5 dýralög - Krissa

The Unicorns - I Was Born (A Unicorn)

Er ekki nauðsynlegt að hafa smá svona mythical beings með? Ég meina, ef einhyrningar væru til í alvöru væru þeir dýr ;) Ég næstum ofhlustaði á Who Will Cut Our Hair When We're Gone? og fannst þetta lag bara endalaust skemmtilegt og fyndið.

Man Man - Push the Eagle's Stomach

Þetta var nú bara úllen-dúllen-doff því það eru alveg 3 Man Man lög sem mig langaði að setja hérna (the other two being Spider Cider og Ice Dogs). Hreint brjálæði og skemmtilegheit og 'mústassj, mústassj, mústassj' sönglið er æði :)

Caribou - Yeti

OK, það er svosem ekkert búið að sanna að Yetis séu til, frekar en einhyrningar, en það er bara aukaatriði því ég elska elska ELSKA þetta lag! Eitt af fyrstu (ef ekki allra fyrsta) lögunum sem ég heyrði með Caribou og ég get engan veginn fengið nóg af því. Lætur mann vilja boppa hausnum, hrista rassinn, vera glaður og fagna lífinu.

The Beatles - Blackbird
Einfalt, stutt og fallegt :)

Bonnie 'Prince' Billy - Wolf Among Wolves

Úff, Master and Everyone var liggur við soundtrack lífs míns í byrjun ársins 2003. Þetta lag vekur upp svo margar minningar að ég fæ ennþá sting í magann þegar ég heyri það. Fallegt og hljómar svo ótrúlega einlægt. Ég fæ líka pínu illt í hjartað þegar ég heyri "why can't I be loved as what I am?"

Og sem very special (jafnvel honourable) mention: Wild Horses í flutningi Iron&Wine og Calexico. Yndislegt lag að öllu leyti. Hef reyndar heyrt margar góðar útgáfur af þessu lagi (og þónokkrar slæmar) en þessi er í uppáhaldi núna. Það er bara eitthvað við þessa rödd.

Topp 5 dýralög - Kristín Gróa

5. Devendra Banhart - Little Yellow Spider

Ég sagðist ekki vera brjálaður Devendra aðdáandi en svo eru bara tvær vikur síðan ég setti síðast lag með honum á lista. Meikar það sens? Nei en svona er ég mótsagnakennd. Þetta er bara mesta dýralag sem mér dettur í hug og það er svo fyndið og sniðugt að ég verð glöð þegar ég hlusta á það.


4. El Perro Del Mar - Dog

Hin sænska Sarah Assbring syngur hér lítið sorglegt lag... all the feelings you've got for me is like if I were a dog. Jahhá ekki er það gott.


3. Dan Deacon - The Crystal Cat

Herra Deacon fékk mjög góða dóma fyrir plötuna sína, Spiderman Of The Rings, sem kom út í fyrra en ég hef reyndar ekki heyrt hana í heild. Mér finnst þetta lag hérna samt alveg æði svo ég skil ekkert í því að ég sé ekki löngu búin að fjárfesta í plötunni.


2. M.I.A. - Bird Flu

Að láta hænsnahljóð hljóma töff á plötu er ekki auðvelt verk en það tókst!


1. Mazzy Star - Wild Horses

Af öllum þeim útgáfum sem til eru af þessu lagi þá er þessi einhverra hluta vegna í mestu uppáhaldi. Mig minnir að ég hafi upphaflega hlaðið þessu niður með Napster þegar ég var unglingur ásamt öðrum gullmolum eins og True Love Waits með Radiohead og Yellow Ledbetter með Pearl Jam sem fengu líka að óma endalaust á þessum tíma.