Topp fimm lög Árna syngjandi í rokinu á hamrabrún...

Listinn er með töluvert íslensku sniði í þetta sinnið því ég komst ekki í tölvuna mína en kemur ekki að sök því Ísland á nóg af roki og hamrabrúnum.



Jet Black Joe - Higher and higher

JBJ-liðar voru undir miklum áhrifum af Hamrinum, einkennisklett Hafnfirðinga og þetta lag myndi ég syngja á Hamarsbrúninni (rétt hjá útsýnisskífunni) í rifnum gallabuxum, ber að ofan, í leðurjakka og með "Flying V" Fendergítar.
Yrði kannski soldið vandræðalegt ef ég rækist á Ragnar Solberg...



Margrét Eir - Heiðin há

Annar Hafnfirðingu hér á ferð og textann samdi þriðji Hafnfirðingurinn, Davíð Þór.
Þetta lag er nokkuð dramatískara en hið fyrra og valdi ég því Ásfjall, lægsta fjall landsins (127 m.) til þess að spangóla þetta lag. Búningurinn yrði að sjálfsögðu viktoríanskur kjóll með lífstykki úr hvalbeinum.



Todmobile - Brúðkaupslagið

Ekkert hafnfirskt við þetta að mér vitandi en massa lag, dramatík, stórir sembalar...það vantar eiginlega bara svona stórar álþynnur sem skapa þrumuhljóð.



Edda Heiðrún Bachmann - Önnur sjónarmið

Mér hefur lengi þótt þetta lag gríðalega epískt, sérstaklega þegar Edda Heiðrún lýsir því yfir að hún muni samt sem áður elska viðkomandi. Það er flott þegar hugsunarlaust orðasamband eins og "samt sem áður" verður svona dramatískt.



Karlakórinn Fóstbræður - Brennið þið vitar

Og talandi um karlakóra þá er ekkert dramatískara en þetta lag. Ég hugsa að ég þyrfti að vera krossfestur á hamrabrún undir djúpri lægð, nú eða bundinn við skipsmastur á Halamiðum í brælu eða ríðandi á harða skeiði undan snjóflóði til þess að skapa rétta stemningu fyrir lagið.